PARNO ADAT

sejak mano mulai munyalo

sejak lubuk tebing tarah

sejak mano mulai bukato

dimulai pulo dengan bismilah

serapat ikan di lubuk

siko ugo ngan kno jalo

ngan banyak kno pukat

serapat kito dengan duduk

kayo ugo ngan tumbuk kato

kami banyak kato mufakat

pasang dap  pasang pulito

di embu mako nyo pejah

kami ini kno ucap kno sayo

jangan pulo jadi duso jadi salah

adopun seisi uhang umah ini

ibarat sepucuk cinok  jalo

ibarat seiring cinok pukat

ado lubuk perumpun ikan

agi mintak diajun,mi ntak diarah

adopun kayo itu

ibarat ujan pungganti payung

ibarat licin pungganti tongkat

ibarat klam pungganti suluh

suluh bindang ugo kayo dalam negeri pumen

adopun kayo itu ibarat makai sko padi

kian berisi kian merunduk

kian tuo kian balaja

kian pandai kian batuik

ado dis melayu ngato

batemu pukat dengan jalo

patut disirat kaduo nyo

batemu adat dengan  dengan pusako

patut dibilang kaduo nyo

adopun kami ini

ibarat enau tuo seganyo rapat

sungguh rapat mako disandai

di sandai mako disuji

kami ini silaku anak mudo

ado pendapat kurang pandai

kalau pandai jangan di puji

kalau salah tolong di tunjukkan

adopun kami ini

belum nyo lentik cinok taji

belum nyo tandai cinok dulang

belum nyo cedik cinok kanti

belum nyo pandai cinok kawan

lalu lalang merbah mandi

batemu ayi basimpang duo

salam lalu sembah kembali

disebut pulo hajat uhang sipungko

kalu nak tau pado bungko

balipat kupado bangka

kalu nak tau pada usul

balipat pado asal

kepasa membeli benang

tabeli tibnang plin

idak ditap idak dibilang

jangan pulo kito nak makan buah puli malin

cinok ladin penggali tubuh

cinok tebu di punggung musang

cinok buluh hayut tngah duo wih

tiapung-apung ti gelang-gelang

idak tentu ujung ngan pangkin

idak pulo wajib pakai kito

mano ngan wajib pakai kito

idak dibilang usul dengan asal

tebit ayi dari hulu

tebit angin dari puhun

tebit getah dari batang

tebit kato dari mulo

mano jadi para mulo kato

ateh kito di tunggu tanah

tak ajo dingan jnang

ateh di sungkut langit

titanai bumi

ateh menjadi so duo

tigo so ayam empat

empat pulo perkaro

mano disebut empat perkaro

so perumpun, duo laki-laki, tigo ama Allah, empat ama Rajo

mano terhadap pgang anak parumpun,

gtarik kain dengan silipek

pandai beringkek balipek sanggun

duduk sopan dengan malu

mano dikato duduk sopan dengan malu

ambak anyam batenun gantih

bakayu baayi basung ba lapo

piuk gedang batunggu jarang

bakembang lapik bakembag tika

lepih mendah pgi pagi

nantik mendah balik petang

itu terhadap pegang anak  perumpun

mano terhadap peging anak laki-laki

tarik kain dengan silipek

dekat lita dengan incung

duduk sopan dengan malu

baru pulo tau tiru turih tauladan

mano dikato tiru turih tauladan

tarik ladin kembali tubu

tarik bedah dengan beliung

masuk imbo kalua imbo

masuk batih kalua

cincang tarah nikun panggung

nebat ka laman mubu mingkah

menggalih mata malak

panagi ngan tngah tigo

minjuan tempat ngan maha

membeli tempat ngan murah

suhut ka dusun dengan laman

kito duduk ba undun dalam berempat

kalu duduk dengan anak bini kito

cinok imau tidu dengan belang

cinok gajah tidu dengan gading

kalu ilang samo murugi

kalu balabu samo mundapat

itu pging laki-laki

mano terhadap pging ama Allah

turun ayat dari Allah

turun hadis dari nabi

jadi quran 30 juz

jadi kitab 30 lpak

diturun di banaik

di biak di kembang

di kembang di baco

agi tikembang sampai kini

mako berdirilah beliau imam ketik dengan berempat

ngan megang empat jurai mesjid

hari satu mantiku limo

shabat empat sifat duo puluh

amma pulo yang duo

mano dikato ama yang duo

satu ama Allah

duo ama Rasul

mano pulo dikato

terhadap pegang ama rajo

satu lih kaduo btul katigo nyembah

menyembah brih itam brih putih

rasul bawang kulit manih

tebu panjang kaladi berisi

kalu idak di harap idak di atur

talendo kupado rajo maru sumai

cincang tara cincang

cincang tiletak diateh paho

idak di tap idak dibilang

idak lepeh ajat uahang sipungko

sekali ke indo puro

duo tigo ku batang asai

sekali mukak puro

imak duo tigo utang selesai

PERNIKAHAN

Ateh kami munaruh anak bujang

Ibarat kebau jalang idak bukandang

Ili lepih mudik talampau

Meencari intan ni mahkoto sati

Mencari dawat hitam kertih putih

Nalak auo suko di tebing

Nalak tebing suko di auo

Mencari ni dengan jernih

Lah diili laman dengan panjang

Lah dimudik laman dengan pendek

Sado lindin sado diketu

Sado pintu sado di centi

Kadang tiketuk pintu umah tinggan

Ta ketuk pulo pintu umah ini

Tak kalo dimaso itu

Disini pulo pumen batemu ning dengan jernih

Dapat intan mahkoto sati

Dapat dawat intan ketih putih

Adat tuo bakarawo

Adat mudo ba kajina

Auo lah suko dengan tebing

Tbing lah suko dengan auo

Ado pulo dis melayu ngato

Tebu hitam dalam plak

Babuwih same babuku

Dengan jantan lah teragak

Batino pulo lah katuju

Lah kami duduk pulo

anak jantan tiganai umah

kayo anak mamak depati penghulu

serto dengan tuan segalo malin

langsung pulo kayo tap ahi

kayo pikih pulo malim

lah kayo bulat ayi di pamuluh

lah kayo beku kato di mufakat

ado pulo dis melayu ngato

anak langkap pai ka langkap

dulu samendo kapayu kumbuh

dulu bakato ngan beli bendi

lah kayo beku kato dimufakat

lah kayo bulat ayi di pembuluh

dengan kayo unding ngan mbuh jadi

langsung pulo kayo pikih kan malem

kayo ktan kan ahi

tepat pulo ahi kamis malam jumat

kayo luduk kan pulo kadi

serto dengan imam ketik

serto dengan nenek mamak pati penghulu

serto pulo kayo ngan cerdik pandai

perangkat desa kayo uhang dusun ini

langsung pulo kayo ijab dengan kabul

lah kayo saksi pulo dimuko masyarakat

serto pulo nenek mamak depati penghulu

dan anak jantan tiganai umah

untuk mengesah anak baduo ini nikah

kalu anak laki baduo ini

imak buruk bingkai di payalin

imak makuk sampai putuh

imak ngebat sampai ptih

jangan makuk babalik-balik

jangan ngebat balipat-lipat

kalu anak laki baduo ini

imak ili serengkuh dayung

imak mudik serentak satang

imak setinting bak besi

imak sitiong bak ayam

imak sirumpun bak srai

itu ngan kito mintak pado Allah pado Rasul

kalu anak baduo ini

imak nyo sugih imak nyo kayo

ba umo imak puli padi

muncahi imak dapat kipeng

ngan ditanam imak cepat tumbuh

ngan di idut imak cepat biak

itu kito pintak pado Allah

adopun  anak laki baduo ini

sari ado sari bagla

sari ado sari ba namo

mano pulo dikato

sari ado sari bagla

sari ado sari ba namo

dulu kito batino agih gadih jie uhang ngato

minin barubah menjadi bini si ANU

jangan pulo kito buat,

kato kayo uhang tuo bahun

agi ugo kayo nyebut pantun

panting ahi ptang mano nian tuo aku nino

panting ahi paneh btang

lah bateban ka kasai

lah ba abang ka bibi

minyak wangi ayak abih ka tigo tabung

nalak tuo mano pgi

itu idak adat pakai kito

dan jugo kito ngan jantan

dulu iyo disebut gla

minin lah barubah jadi laki si ANU

jangan pulo dibawo cinok ayam garugo

panteng nyo ngimak lawan kapiyen nyo lah mananggak

panting nyo ngimak anak gadih, ngan abang bibi, ngan teban kasie

awak lah nga rinde

panting ahi ptang lah balicin  siah ambut

same basiun dengan bakukuk

ngato simpang ngan mano adik ku duduk

itu idak adat pakai kito

kalau kito duduk suku sumendo

jangan pulo dibawo sko gajah gedang

so gdang nak mengeban

so tinggi nak munando

idak adat pakai kito

jangan pulo dibao sko kacang miang

sado uhang di singkut sado kno miang

sado uhang tisising sado kno sia

tilando dibateng uhang nak diki

itu idak adat pakai kito

jangan pulo dibao sko kucing kurus

tau di lapo awak tu lah

idak di tau kanti kiri kanan

idak pulo adat pakai kito

jangan pulo dibao sko kayu tinggi

sado uhang nak di impin

uhang numpang bateduh, lahan nyo skah uhang nak di timpo

same ado pulo baliung kanti ngan tajam

lambat cepatawak bah jugo

itu adat idak pakai kito

mano adat pakai dikito

yo lah semendo tanggu rapek

anak kecik nyo imak tau nekin

uhang tuo imak tau naka

mandi dengan budak ngahu ayi

makan dengan budak ngahu imah

kalu usik dengan uhang tuo, jangan rugi kapu dengan sihih

kalu usik kito simingkat, jangan rugi ukok sibatang

kalu usik dengan budak, jangan rugi gulo-gulo suah

itu nyo adat pakai kito

ini pumen cincang tara cencang

pulut itam dalam belek

uhang baumo ditepi kandang

kalu dientang umbuh nyo panjang tali lang-lang

iluk pulo di puntan imak nyo singkek sepanjang tali kambek

karno ahi sudah larut petang

ini kato idak panjang

durian ditengah padang

akanyo nyusun munyusun

kamenyan lah dipanggang

pa lanta lah diajun

 baco kan doa dengan berkat doa dengan selamat

mano jadi berkat, mano jadi selamat

mintak di jauh sekalian bla, ampe sekalian reski

kito singgok ini kalateh

kacak imak nyo baik

reski imak nyo murah

umur imak nyo panjang

amal ibadah imak nyo batambah-tambah

doa imak di kabulkan Allah

singgok ini pumen ngan dapat kanti ngato

TUMBUK KATO

Basilat ikan dalam lubuk

Ikan siruang kno jalo

Serapat kito dengan duduk

Kami disini ngan tumbuk kato

Uang kayo itu uang timbago

Dititing sini tembago pulo

Kato kayo itu kato adat dengan pusako

Dijawab dengan kato adat pusako pulo

Lah kayo tap lah kayo bilang

Sejak awal  sampai akhir

Lah batiti pangkan tali sampai ka ujung tali

Ili lah ti ilim mudik lah ti muaro

Kalateh lah tibo ka embun padu

Ka bawah lah sampai kekersik mudo

Batemu pulo dengan ikan buranak msu

Ikan buranak msu idak pulo pandai burayi

Namun idak kami juap kato kayo

Nampak pulo kami itu baben munali

Cinok purago dengan batu tunggo

Namun di juap kato kayo itu

Nampak pulo kito cedik nak babalah kato

Ado dis melayu ngato

Gedang ayi uhang sungai landai

Ujan sebelah dari ulu

Idak pulo kami ngacak cerdik engan pandai

Menurut telatah tilitih uhang tuo dulu

Titah uhang tuo dulu

Adat kato ba juap

Adat andai ba tingkah

Adat gayung basambut

Ibarat ngirang padi di tengah sawah

Namun nak disusun idak ado ngan jarang

Namun nak di tuhing idak ado ngan kerap

Sado kayo tap sado benar

Sado kayo bilang sado betul

Lah pandai nian kayo ba tap ba bilang

Asal lah babilok jadi uki

Asal lah ba bentang jadi barih

Ini pumen.....(ULANG KATO UHANG)

Ado dis melayu ngato

Rapat lah rapat munjihat jalo

Jalo di jihat dengan menang soto

Lah kayo tap lah kayo bilang dengan kato pusako

Kami sambut dengan kato pusako pulo

Ini pumen gdang gayung nebat-nebat

Pedang diletakkan

Lik kaji disudahkan

Surat di lingkutkan

Lik kato dimufakat

Bicaro usai

Panjang jambak urang sulak mukai

Jalan uhang pgi ka pasa

Tumbuk mancang kato rupo sudah lah sampai

Tentang maco doa kito serah kebuya

Lurus  jalan ku koto rendah

Jalan terus ke talang tinggi

Tentang mancang kato mna lah sudah

Kalu maco doa kito serah ke pak haji

KEMATIAN

Adopun uhang seisi umah ini

Untung idak dapat diraih

malang idak dapat ditolak

mano dikato untung idak dapat diraih

malang idak dapat ditolak

tumbuh bak senawan

inggap bak langau

terbang bak bungo api

tasauk bak kain basah

dekat penyakit tak kalo masa itu

iyo adat kayo bahun

lah pgi pulo sirantang ili sirantang mudik

mencari dukun dengan pandai tawa

mencari lam dengan pandai jampi

adat minin

lah pgi pulo nalak  dokter pandai ngubat

nalak mantri ngan pandai nyuntik

dokter jauh lah datang

mantri parak lah tibo

yo sado ubat dengan lekat 

jadi nambah punyakit galo

sekali ubat lekat

duo tigo panyakit batambah

sekali mantri nyuntik

duo tigo panyakit batukuk

yo idak dapat ditulung agi pumen

sudah kehendak Yang Maha Kuasa

ado dis melayu ngato

apolah sukat padi payo

skam belah dalam gantang

iyo idak lah lalu kuhendak kito

kuhendak Allah jugo dengan datang

angin yo lah bara tiup

umbak yo lah bara sambung

disepi emas dengan perak

di kalakang harto dengan bendo

ditengah jiyo di maso itu

yo ilang TUAN dimaso itu

bukan pulo ilang sio-sio

bukan pulo ilang di bukit dengan tinggi

ilang dilusun dengan laman

ilang dirumah dengan tanggu

ilang di pangku anak buah anak kaponakan beliau

ado dis melayu ngato

pisau peraut dalam kampin

kampin burisi ado sebelah

malaikat maut datang mumanggin

ajallah datang dari pado Allah

yo dituhut pulo dalam adat

dengan peraturan agamo islam

dimandi, dikapin, disebahyang,

langsung pulo dianta ke tanah layu

balik pulo kurumah dengan tanggu

suhut pulo kito kadusun dengan laman

dituhut pulo patah kato taliti limo perkaro

pertamo makan nasi kanuhun

ka duo nigo ahi

 katigo nujuh ahi

ka empat empat puluh ahi

kalimo seratuh  ahi

tepat pumen malam ini UHANG 7 AHI.........

TUMBUK KATO

Lak bakilat ikat dalam lubuk

Ikan siruang kno jalo

Lah sirapat kito dengan duduk

Kami disini ngan tumbuk kato

Uang kayo itu uang tembago

Ditinting sini timbago pulo

Kato kayo itu kato adat dengan pusako

Dijawab kato adat pusako pulo

Ba umo ditepi ayi

Padi ngarenggok singgok pinggang

Nyawab kato kayo itu serto dengan piki

Entah mano lebih ta kurang

Lah kayo tap lah kayo bilang

Sejak awal sampai ku akhir

Lah batiti pangkan tali sampai ka ujung tali

Mudik lah ti ulu

Ili lah ti muaro

Kulatih lah ku embun padu

Ka bawah lah ku karang jati

Lah tengah ku resik bulan

Namun idak dijuap kato kayo itu

Pumen kito orang cerdik pandai bubalah kato

Bukan dikito cerdik pandai bubalah kato

Menurut adat telatah telitih uhang tuo dulu

Ado dis melayu ngato

Gedang ayi uhang sungai landai

Ujan sebelah dari ulu

Idak pulo kami ngcak cerdik dengan pandai

Menurut titah uhang tuo dulu

Mano dikato titah uhang tuo dulu

Adat kato bajuap

Adat andai batingkah

Adat gayung basambut

Habis gayung dengan penbat nyo

Pedang diletakkan

Habis kaji dengan be dalil

Surat dilingkutkan

Habis kato dengan mufakat

Bicaro usai

Ibarat ngirang padi ditengah sawah

Namun nak disisun idak ado ngan jarang

Namun nak dituhing idak ado dengan kerap

Sado kayo kato sado yo

Sado kayo bilang sado bena

Lah pandai nian kayo ba tap ba bilang

Tabilok kato kayo itu menjadi uki

Asal lah babentang jadi barih

Minin pumen

Panjang jambak uhang sulak mukai

Jalan uhang pgi ku pasa

Tumbuk mancang kato rupo lah sampai

Tentang maco doa kito serah pado buya